Роза Сябитова кызын икенче тапкыр кияүгә биргән
Роза Сябитова, туй турында сөйләгәндә, татар халкының кунакчыллыгы, килгән кунакларны кыстап ашату, ахырдан күчтәнәч җибәрүе кебек традицияләрен дә искә алган.
Димче, «Давай, поженимся» тапшыруы алып баручысы Роза Сябитова кызы Ксенияне икенче тапкыр кияүгә биргән. Инстаграмдагы аккаунтында ул яшьләрнең шатлыклы көненнән фотолар куеп, берничә пост урнаштырган.
Туй димченең бакчасында, аз санлы кунаклар белән үткән. «Илдәге вәзгыятькә бәйле рәвештә, күп яшьләр туй көннәрен күчерделәр. Ксения белән Максимга кунаклар да, купшы туй да кирәк түгел иде. Иң мөһиме — алар бер-берсен яраталар һәм бергә булырга теләделәр», — дип язган ул.
Флористлар һәм декораторлар Роза Сябитованың бакчасыннан бик матур, романтик урын ясаганнар. Туй фотоларын караганнан соң, тантананың кечкенә бакчада, гади итеп үткәрелүенә ышанып та булмый. Бакчаны зәңгәрсу төстәге чәчәкләр белән бизәгәннәр. «Чәчәк композицияләре миңа 51 мең сумга төште», — дигән димче.
Роза Сябитова, туй турында сөйләгәндә, татар халкының кунакчыллыгы, килгән кунакларны кыстап ашату, ахырдан күчтәнәч җибәрүе кебек традицияләрен дә искә алган. «Сез ничек уйлыйсыз, туй үткәргәндә үз халкыңның традицияләрен сакларга кирәкме? Әллә яшьләргә бу кирәкмиме?» — дип сораган ул инстадусларыннан.
«Татар халык табынының иң мөһим өлеше — чәй эчү. Кунакка киләсезме сез, туйда утырасызмы — мөһим түгел. Чәй эчүнең төп кагыйдәсе — чәйнектә су бетмәскә, өстәл төрле тәм-томнан, гөбәдия, баллы пироглардан сыгылып торырга тиеш. Ксениянең туенда, тулысынча ук булмаса да, татар табынының кайбер кагыйдәләрен үтәргә тырыштык», — дип язган ул.
Инстадуслары Ксениягә матур, бәхетле тормыш теләгәннәр. «Туйда татарча биедегезме соң?» — дип сораганнар.
«Татар халык биюен Ксения белән мин генә беләбез. Калганнары музыкага селкенеп кенә тордылар», — дип көлгән Роза Сябитова.