«Гаилә» мәчете имам хатыйбы Рөстәм хәзрәт Хәйруллин «Татарстан – Яңа гасыр» телеканалында «Сөйләшергә вакыт» тапшыруында кунак булды.
«Сез никахлар укыйсыз, кеше тормышында ул – иң зур матур вакыйга инде. Күпмедер вакыттан соң ул таркала. Озак еллар яшиләр, читтән карап торганда матур гаилә кебек, бер дә аерылмаслар кебек тоела. Яшь вакытта һәм шактый озак бергә яшәгәннән соң аерылышу сәбәбе нидә икән?» – дип сорады тапшыруны алып баручы Лилия Кадыйрова.
«Әти-әниләр якынрак булсын иде. Бер түбә астында булмаса да, ешрак аралашырга тырышырга кирәк. Хәзерге яңа технологияләр, видеошалтыратулар белән булса да. Әти-әниләр безнең тормышта күбрәк булсын. Алар күрә, сизә бит. «Кызым ни булды?» – дип сорый. Шуннан кызы елап, күңелен бушата да, җиңелрәк була. «Ярар, кызым, әтиең дә, бабаң да шулай булган», – дип әйтә дә әнисе, шуның белән узып китә. Әти-әниләр балаларына күбрәк ярдәм итсеннәр иде. Айга бер кайтабыз, барабыз, дию генә аз.
Аннары өйдә аз сөйләшәбез. Беребез телефонда, икенчебез телевизор карый. Өйгә кайттык, исәнләштек, хәлләрне сораштык та – шул. «Вайфай»ны сүндереп сөйләшергә яки телефонда утырган килеш уңайлы икән – шулай сөйләшергә кирәк. Күбрәк аралашу мөһим.
«Хәзрәт, мин көне буе плитә янында. Ә ул кайта да носкиен ташлый», – дип әйтәләр.
Сез без – ирләрне дә аңлагыз, ишек төбендә носки ята икән, мин аны ташламадым, куйдым. Киткәндә миңа җиңелрәк аннан алып кияргә. «Әнә урыны бар бит, шунда куйсын», – дип әйтәләр инде. Сез гаражына керсәгез, анда да аның әйберләре кул астында ята, аңа шулай җайлы. Сезнеңчә, ул дөрес ятмыйдыр. Урындыкка ыштан элеп кую да ошамый сезгә. Ул бит шкафны ачарга, нәрсәсен алырга-нитәргә кирәк. Шулай элгәч, кесәдән бөтен әйберләр төшә, ул безгә уңайсыз. Сез аңарга ачуланасыз. Ул урындыкка элгән дә, иртән рәхәтләнеп кигән дә киткән. Ә ул сезгә авырлык китерә. Ярый хатын-кызның күлмәге озын, әйберләре сумочкада. Ә безнекеләр кесәдә бит.
Сөйләшергә, аралашырга кирәк. Нәрсәдер ошамый икән «матурым, дустым, җаным, чәй эчкәч миңа рәхмәт әйтмисең икән, үпсәң миңа рәхәтрәк булыр иде» дияргә була. Безнең сүз нормасы бар: ирләрдә 3 мең, хатын-кызда 20 мең. Ир-ат көне буе аралаша торган эштә икән, сүзе бетә, өйдә балык булып утыра инде ул. Аның нормасы беткән.
Ирләргә, сүзләрегезне азрак өйгә калдырыгыз, хатыныгызга матур сүзләр әйтегез, бүләк бирегез, дип әйтәбез», – дип сөйләде хәзрәт
Хәзрәт бу хакта «ТНВ» видеосында 22.00 минутта сөйли башлый.