Рөстәм Нәбиев Эльбруска менүе турында сөйләде: «Беренче мәртәбә космоска очу кебек»

Казанда махсус операция катнашучылары арасында һөнәри осталык буенча «Абилимпикс» чемпионаты кысаларында «Махсус операциядә инвалидлык алган кешеләрне спорт аша тернәкләндерү» дип аталган очрашу булды.

Анда Россия Иҗтимагый палатасы әгъзасы, Башкортстан башлыгы каршындагы кеше хокуклары һәм гражданлык җәмгыяте институтларын үстерү советы әгъзасы, «Знание» премиясе лауреаты Рөстәм Нәбиев чыгыш ясады.

Кулларына таянып Эльбрус тавына 3 тапкыр менгән параальпинист үзенең катлаулы тарихын сөйләде. Рөстәм – Россия рекордлары һәм Гиннес рекордлар китабының альпинизм буенча рекордсмены, 5 тапкыр дөнья рекордсмены.

«Мин хәрби хәрәкәтләр вакытында имгәнмәдем, әмма чынлыкта исә моның әһәмияте юк, кеше барыбер бер җиргә – госпитальгә эләгә, һәм шунда аның яңа тормышы башлана. 2015 елда Омскида мин һәм хәрби иптәшләрем яшәгән казарма җимерелде. Мин исән калдым», – дип сөйләде ул.

Тернәкләнү 11 ай дәвам итә. 24 яшендә Рөстәмгә яңадан яши башларга – утырырга, сөйләшергә, кашык тотарга өйрәнергә туры килә.

«Мин протезда йөрим. Аякларым өстән үк ампутацияләнгәч, миндә иң заманча протезлар булса да, бу – бик катлаулы», – дип аңлатты Рөстәм Нәбиев.

Аякларын югалтканчы, Рөстәм спорт белән актив шөгыльләнгән була. Шуңа күрә ул госпитальдә ятканда да тартылган, отжимание ясаган.

«Табиблар минем үҗәтлеккә шаккатты – «культи»ларым кыска гына булса да, мин 1,5 айда аякка бастым», – ди Рөстәм.

Химкида реабилитация вакытында Рөстәм бер ир-атның Чечняда сугыш вакытында аякларын югалтуын, әмма следж-хоккей белән шөгыльләнә башлавын һәм команда составында Сочида көмеш медальләр яулавын белеп ала. Рөстәм шулай следж-хоккей белән, ә соңрак альпинизм белән шөгыльләнә башлый.

«Кеше, имгәнеп өенә кайткач, сына. Анда син чынбарлык тормышка килеп эләгәсең, анда җәмгыять синең хәзерге халәтеңдә кабул итәргә күнекмәгән. Өйдә пандуслар, тотынгычлар барлыкка килде. Шуларга карыйсың да, гомер буе шушы әйберләр белән яшәргә туры киләчәген аңлыйсың», – диде ул.

Инвалидлыгы булган башка спортчылар белән танышкач, Рөстәм үзенең ялгыз булмавын аңлый. Ул следж-хоккейда мөмкин булган барлык бүләкләрне дә ала һәм биатлон, парашют спорты белән шөгыльләнә башлый.

«Спорт мотивация, көч һәм эчке чыдамлык бирә», – диде Рөстәм Нәбиев.

Аяклары булмаган ир-ат, бөтен кешене шаккатырып, кулларына таянып, Эльбрус тавына менә.

«2020 елда без, кулларга таянып, Эльбруска менеп карадык. Күп кенә скептиклар, профессиональ альпинистлар «бу – мөмкин түгел, без һәлак булырга мөмкинбез» диде. Әмма без бу юлны уздык. Бу – безнең өчен беренче мәртәбә галәмгә очу кебек булды», – дип исенә төшерә ул.

Рөстәм Һималайдагы – Манаслу, Грузиядә – Казбек, Африкада Килиманджаро тауларына да менә.

«Кеше хәтта аяксыз булып та, куллары ярдәмендә генә шундый биеклекләргә алуны күрсәтә ала икән – бу искиткеч», – диде параальпинист.

Ул үз алдына алга таба да яңа биеклекләр яулау максаты куя. Спортчы күптән түгел генә күп балалы әти дә булды – аның гаиләсендә өченче бала туды.

Рөстәм Нәбиевнең тарихы очрашудагы махсус операция ветераннарын да рухландырды. Сөйләшүдән соң алар аның янына килеп сораулар бирде, истәлеккә фотога төштеләр.

Махсус хәрби операция катнашучылары һәм ветераннары өчен һөнәри осталык буенча Казанда узган «Абилимпикс» чемпионатына илнең 81 төбәгеннән 259 катнашучы җыелды.

Чараны Россиянең Мәгариф министрлыгы, Татарстан Хөкүмәтенең Һөнәри белем бирүне үстерү институты һәм махсус операция катнашучыларына ярдәм итүче «Ватан сакчылары» дәүләт фонды ярдәме белән «Знание» Россия җәмгыяте оештыра.

Чыганак: «Татар-информ», Наталья Рыбакова