Рөстәм Асаев «плюс»ка җырлаучылар турында: «Электр утын сүндереп карарга кирәк»

«Татарстан – Яңа гасыр» телеканалында «Сөйләшергә вакыт» тапшыруын алып баручы Лилия Кадыйрова кунак белән таныштырды:

«Ул башка җырчылардан зәвыклылыгы, үтә тыйнаклыгы белән аерылып тора. Нәкъ сәхнә өчен яратылган. Төз гәүдә, ягымлы караш, сирәк өчрый торган бас тавыш. Татарстанның халык, Башкортстан атказанган артисты, 4 бала әтисе Рөстәм Асаев булыр», – диде ул.

– Тавышыгызны ничек тәртиптә тотасыз?

– Иртән җырлап тикшереп карыйм, тавыш бармы-юкмы. Тәртип ул – вокаль режим. Кирәкмәгән салкын әйберләр эчмим инде мин. Чикләвекләр дә зыянлы. «Рөстәм, сиңа теге-бу ярамый инде», – дип әйтүчеләр бар. Быел алай да туңдырма ашарга туры килде. Бик күп еллар ашаган юк иде.

– Мин сезнең бернинди гонорарга да кышын урамда эшләмәвегезне беләм. Бу – сезнең кагыйдәгезме?

– Әйе, анысы дөрес. Исәнлекне уйлап. Анда бер җыр җырлыйм да, аннары нишләргә кирәк? Миңа бит иртәгә дә, берсекөнгә дә җырларга кирәк. Ул бит минем эшем, «тавышым юк әле» дип әйтә алмыйм.

– Ә «плюска» гына эшләсәң? Хәзер күп кеше шулай эшли, проблема күрми.

– «Плюс»ка эшләү – әрсезлек. Ул минем юлым түгел. 100 процентның 5 процентында кулланылырга мөмкин. Бик кирәктә фонограммага җырлаган бар, әмма мин тере тавыш яклы. «Плюс»ка җырлау бик авыр бит ул. Алай җырлауның энергиясе юк. Чыгып җырлыйлар инде, үз тавышларына сокланып.

– Андый очракта, бәлки, ярты эстрада җырлый да алмас инде.

– Аның өчен электр утын гына сүндерергә кирәк. Күпләр башка һөнәр сайлар, заводка эшкә урнашыр иде. Бүгенгә андый мөмкинчелек юк, шуңа күрә алар фонограммага җырлап йөри.