Россиянең бер шәһәрендә тракторга юл бирмәгән кызны видеога төшергәннәр
Инстачылар полиция чакыртырга, трактор тик торган өчен штраф түләтергә, хәтта таптатырга тәкъдим иткән.
Ярославль шәһәрендә яшәүче хатын-кыз кар чистарта торган тракторга юл бирмәгән. Тракторчы тротуардагы карны чистарткан. Тротуардан килгән җәяүле тракторга юл бирмичә бер сәгать басып торган. Бу хакта «Казан. Татарстан. Видеолар» аккаунтында хәбәр ителә.
Видеоны төшерүче сөйләгәнчә, кыз, җәяүле буларак, аңа техника юл бирергә тиеш дип санаган. Ә тракторчы, үз чиратында, эшли торган техника җәяүлегә юл бирергә тиеш түгел, дип уйлый. Кешеләр тротуардан читкә чыгып, мөһим эш башкаручыга комачауларга тиеш түгел дигән фикердә тракторчы.
«Юлларны чистартмыйлар дисез, менә шундый кешеләр аркасында инде ул. Җәяүле тракторга узып китәргә бирми. Тракторга „миң уза алмыйм, юл бир“ ди. Менә кайсы хаклы инде? Ә син монда камерага кара, күршеләрең сәлам әйтер сиңа», — дип сөйли видео төшерүче.
«Кешедә каян шулкадәр буш вакыт», — дип аптыраган инстачы белән күпләр килешкән.
«Кайбер кешеләрнең трактор каршында торудан тыш эше юк бугай. Аннары үзе үк тротуар чистартылмаган дип зарлана бит инде»;
«Әле дә басып торалармы икән? Хезмәткә хөрмәт бармы ул? Юл хезмәте барлык кеше өчен тырыша, ә бу туташ принцип дип тырыша. Без дә балаларны «хокуклар» белән үстерәбез. Менә җимешләрен татыйбыз»;
«Алай ачуланмагыз әле, башы „дөрес“ түгелдер. Авыру кешеләргә каты бәрелеп булмый» кебек комментарийлар бар.
Шулай ук полиция чакыртырга, трактор тик торган өчен штраф түләтергә, хәтта таптатырга тәкъдим итүчеләр бар.
