Россия Мәгариф министрлыгы мәктәпләрдә тарих дәресен беренче сыйныфтан ук укытуны планлаштыра. Бу хакта министр Сергей Кравцовка сылтама белән ТАСС агентлыгы хәбәр итә.
«Тарихи хәтер саклансын өчен барысын да эшләячәкбез. Мин тарих фәнен беренче сыйныфтан ук укыту карарын кабул иттем», - диде Сергей Кравцов.
Министр әйткәнчә, ил тарихын укытканда Белоруссия, Украина халыкларына карата начар мөнәсәбәт булдыруга министрлык юл куймаячак.
Мәгариф министрлыгының матбугат хезмәтендә әйтүләренчә, әлеге инициатива «мәктәп программасының бөтен мөмкинлекләрен файдалануны» күз уңында тота. Хәзер Россия мәктәпләрендә тарих фәне 5 сыйныфтан башлап укытыла.