Россия 2027 елда пенсияләрне ике тапкыр индексацияләүгә кире кайта алачак, дип белдерде вице-премьер Татьяна Голикова.
«Озын тәнәфестән соң – ул 2019 елда башланган иде – без 2027 елда Социаль фонд бюджетына ике индексацияне кире кайтардык», – диде ул «Чиксез мөмкинлекләр» дигән беренче Бөтенроссия конкурс-премиясе башлануга багышланган матбугат очрашуында.
Шулай итеп, беренче индексация 1 февральдән реаль инфляция дәрәҗәсендә үткәреләчәк, якынча 6,8 процентка, ә аннары, 1 апрельдән, өстәмә рәвештә 3,3 процентка арттырылачак.
Вице-премьер сүзләренчә, барлык социаль пособиеләр һәм түләүләр дә индексацияләнәчәк: финанслау тулы күләмдә 2027 елга һәм 2028-2029 еллардагы планлаштыру чорына каралган бюджетта исәпкә алынган.
Көн алдыннан хезмәт һәм социаль яклау министры Антон Котяков киләсе елда ике тапкыр индексацияләүдән соң 37,5 миллион россияленең иминият пенсиясе күтәреләчәк, дип билгеләп үткән иде.
«Чиксез мөмкинлекләр» – Россия Хөкүмәте каршындагы социаль өлкәдә попечительлек мәсьәләләре буенча советның җәмгыять өчен мөһим инициативасы, анда Татьяна Голикова рәислек итә. Конкурс Хезмәт министрлыгы, Цифра министрлыгы, Мәгариф һәм фән министрлыгы, Мәгариф министрлыгы, Сәнәгать министрлыгы, Икътисадый үсеш министрлыгы, Сәламәтлек саклау министрлыгы һәм Росмолодежь ярдәмендә үткәрелә.