Төмән өлкәсендә яшәүче 26 яшьлек кызның ашказаныннан чәнечке алганнар. Бу хәл Ишим шәһәрендә булган. Пациентны 4нче өлкә хастаханәсенә төнлә китергәннәр. Бу хакта медицина учреждениесе матбугат хезмәте хәбәр иткән.
Кызның сүзләренчә, ул күп итеп майлы ризык ашаган һәм тамакка чәнечке тыгып, космакчы булган. Әмма кулындагы чәнечке ычкынып, тамакка төшеп киткән.
Пациентка рентген ясаганнан соң чәнечкенең ашказанына төшкәне ачыкланган. Хирург операция ясап чәнечкене алган. Бәхеткә, чәнечкенең очлы ягы кызның ашказанына зыян китермәгән. Киресенчә булган очракта, перитонит башланырга яки кан китәргә мөмкин иде.
Хәзер чәнечке йоткан кыз хирургия бүлегендә ята, аның сәламәтлегенә куркыныч янамый.