Россиядә яшәүче Альбина чит ил киявеннән 16 миллион алган да «үлгән»

Германиядә яшәүче ир-ат Россия полициясенә мөрәҗәгать иткән. Ул социаль челтәрдә Россия кызы белән танышып, миллионнарын югалта. Бу турыда РЕН ТВ хәбәр итте.

Кыз челтәрдә Германия кешесе белән аралаша. Аннары үзенең үлеме турында хәбәр итә. Имеш, кыз үлгән. Шуңа кадәр чит ил кияве кызга 16 миллион сум акча биреп өлгерә.

РЕН ТВ белешмәсе буенча, Германия гражданины сүзләренчә, ул социаль челтәрдә Альбина исемле кыз белән таныша. Алар хат языша, тик чынбарлыкта бер тапкыр да очрашмыйлар. Шулай да туйга әзерләнә башлыйлар. Кияү белән кәләш туй тантанасын планлаштыра. Ир-ат кызга акчалар җибәрә башлый.

Аннары Германия гражданинына почтага хат килә, билгесез кеше Альбинаның үлүен яза. Хәзер бу кеше дә кияүдән 200 мең евро акча сорый. Имеш кызны җирләргә акча кирәк. Ир-ат акчаны күчерә. Шулай итеп ул барлыгы 16,4 млн сум акчасыннан колак кага.

Хәзер эшне полиция тикшерә.