Россиядә шикәр диабеты белән авыручылар арткан

Россиядә соңгы биш елда шикәр диабеты белән авыручылар саны 23% арткан. 2013 елда алар 3,9 миллион булса, 2018 ел азагына инде 4,8 миллион тәшкил итә, диелә Сәламәтлек саклау министрлыгы хәбәрендә. 

Диабетлы кешеләрнең иң күбе Псков өлкәсендә яши. Анда 100 мең кешегә 4,8 мең авыручы ачыкланган. Тула һәм Иваново өлкәләрендә шул ук санга 4,5 мең очрак, Карелиядә 4,4 мең очрак, Орел өлкәсендә 4,3 мең очрак туры килә. Иң түбән күрсәткеч Дагыстанда - 100 мең кешегә бары 1,1 мең очрак туры килә.

Эндокринолог Анна Гончарова белдерүенчә, шикәр диабеты белән авыру очракларының күбәюе беренче чиратта гражданнарның тормыш итү тәртибе үзгәрүе белән бәйле. Риск төркемендә артык авырлыктан интегүчеләр, инсулинорезистентлыклы кешеләр, артыгын ашаучылар, аз хәрәкәтләнүчеләр. Табиб илдә диабет диагностикасының да югары булуын әйтте, әмма кайбер пациентларның табиб кушканнарны үтәмәвен искәртте.