Россиядә QR-код ясалган татуировка күрсәтеп кафега керү мөмкинлеге барлыкка килде
Мәскәүдә кафе һәм рестораннарга прививкасы булган яки соңгы ярты елда ковид белән авырып терелгән кешеләрне генә кертәләр.
Мәскәүдә соңгы алты ай эчендә ковид белән авырып терелгән яки прививка ясаткан кешеләр тәненә шәхси QR-код ясатып куя ала. Аннары шушы кодны күрсәтеп ресторан һәм кафеларга кереп була. Бу турыда «Челнинские известия» язды.
Әлеге хезмәтне азык-төлек китерә торган зур хезмәтләрнең берсе оештырган. Үзеңнең кодыңны ясатуның алты варианты бар — ошаганын сайларга була.
Мондый татуировка тәндә ике атна тора. Аны ясату өчен ашарга китертү хезмәтен сайтта рәсмиләштерергә кирәк. Аннары шәхси кодны менеджерга җибәрәсе.
Хәзерге вакытта Мәскәүдә кафе һәм рестораннарга прививкасы булган яки соңгы ярты елда ковид белән авырып терелгән кешеләрне генә кертәләр. Моны раслау өчен QR-код кирәк.