Россиядә коронавирус йоктырган 100 яшьлек әби терелгән
Әбине юбилее көнендә хастаханәдән чыгарганнар.
Россиядә Пелагея Пояркова исемле 100 яшьлек әби коронавирус авыруын җиңеп чыккан. 13 майда үзенең 100 яшьлек туган көнендә Пелагея Михайловна Пояркованы хастаханәдән чыгарганнар. Бу турыда РФ Федераль медицина-биология үзәгенең сайтында хәбәр итте.
Пояркова — Россиядә коронавирустан терелеп хастаханәдән чыгарылган беренче 100 яшьлек пациент.
Әби хастаханәдә планлы дәвалау курсын узганда коронавирус йоктыра. Аның янында палатада ятучы хатын коронавируслы булып чыга. Аны РФ Федераль медицина-биология үзәгенә расланган COVID-19 диагнозы белән китерәләр. Әби комплекслы терапия уза.
«Пелагея Михайловна Мәскәүдә туган. Бөек Ватан сугышында ирен югалткан, кулында күкрәк баласы белән ялгыз калган. Хәзер Пелагея Михайловна кызы һәм кияве белән яши», диелә хәбәрдә.
РФ Федераль медицина-биология үзәге әбине юбилее белән котлый һәм нык сәламәтлек тели.