Россиядә исерткеч мәк үстерә башлаячаклар дигән сүз дөресме?
Дәүләт предприятиеләре йоклата торган мәк үстерү хокукын алачак. Хөкүмәт вәкилләре моны Мәскәүгә каршы санкцияләр керткән илләргә бәйле булудан котылу өчен кирәк дип аңлата.
Хөкүмәт Россия территориясендә медицинада куллану өчен наркотик матдәле мәк үстерү тәртибен билгели торган закон проектын хуплады, дип яза РБК. Бу хакта РФ сәнәгать һәм сәүдә министры Денис Мантуров әйткән.
"Без наркотик һәм психотроп матдәләр турындагы законга үзгәрешләр кертүне хуплаттырдык. Бу дәүләт предприятиеләренә, илне дарулар белән тәэмин итү максатында, наркотиклы үләннәрне куллану гына түгел, үстерү хокукын да бирүгә кагыла", - дигән Мантуров.
Наркотик матдәле үләннәр үстерүне, чимал әзерләүне һәм дару җитештерүне РФ эчке эшләр министрлыгы контрольдә тотачак. "Бер генә субстанция дә легаль булмаган әйләнешкә эләгергә тиеш түгел", - дигән министр Владимир Колокольцев.