«Россия халыкларының традицион костюмы» Бөтенроссия фестиваленә гаризалар кабул ителә

Казанда 4-6 сентябрьдә «Россия халыкларының традицион костюмы» Бөтенроссия фестивале була. Катнашу өчен гаризалар 7 августка кадәр кабул ителә. Бу турыда Татарстан Мәдәният министрлыгы хәбәр итә.

Бәйгедә иҗат коллективлары (остаханәләр, һөнәрчелек йортлары, мода театрлары); гаилә династияләре; индивидуаль осталар, рәссам-модельерлар; студентлар һәм иҗади белгечлекләр укытучылары катнаша ала.

Катнашучыларның яше чикләнмәгән.

Конкурс номинацияләре:

• Этнографик костюм: локаль үзенчәлекләрне һәм технологияләрне саклап, реставрация һәм реконструкция.
• Сәхнә костюмы: театр яки хореография коллективы репертуарына нәзакәтле стилизация.
• Заманча автор костюмы: традицион кисү, орнаментлар һәм образлылык нигезендә ясалган киләчәкнең трендлы киеме.
• Традицион костюмлы курчак: милли киемдәге кулдан ясалган курчак (үлчәмнәре һәм материаллары чикләнмәгән).
• Костюмның аксессуарлары: билбаулар, баш киемнәре, перчаткалар, бияләйләр, сумкалар, яулыклар, бизәнү әйберләре һәм аяк киемнәре.