Россия Украинада тынычлык режимы игълан итте
Тынычлык режимы иртәнге унда ике шәһәр өчен гамәлгә керә.
Россия Мариуполь һәм Волноваха шәһәрләреннән тыныч халык чыксын өчен тынычлык режимын игълан итте, дип хәбәр итә РИА Новости.
«Бүген, 5 мартта, Мәскәү вакыты белән иртәнге унда Россия тарафыннан тынычлык режимы игълан ителә, Мариуполь һәм Волноваха шәһәрләреннән тыныч халык чыксын өчен гуманитар коридорлар ачыла», — дип хәбәр итте Саклану министрлыгы.
Гуманитар коридорлар һәм тыныч халыкка маршрутлар Украина ягы белән килешеп башкарыла.
Донецк халык республикасы атышны туктату режимына әзер булуын әйтте. Шул ук вакытта шәһәр халкының гуманитар коридор турында мәгълүматлары булмавы һәм хәзерге вакытта моны аңлату эшләре баруы әйтелә.
Украина президенты Владимир Зеленский офисының киңәшчесе Михаил Подоляк әйтүенчә, Волновахадан 20 мең, Мариупольдән 200 мең тыныч халык чыгып китәргә тели. Бу шәһәрләрне әлеге вакытта Украина хәрби көчләре контрольдә тота, әмма алар ДНР тарафыннан чолгап алынган.