Россия Тикшерү комитетының элекке рәсми вәкиле Владимир Маркин вафат
Соңгы елларда Маркин каты авырган.
Россия Тикшерү комитетының элекке беренче рәсми вәкиле Владимир Маркин вафат булган.
«Хезмәттәшебез, Россия Тикшерү комитетының Массакүләм мәгълүмат чаралары белән хезмәттәшлек идарәсенең беренче җитәкчесе, юстиция генерал-майоры Владимир Иванович Маркин вафат. Бу барыбыз өчен дә зур югалту. Владимир Иванович харизмага ия шәхес, битараф булмаган кеше иде, үз эшенең чын остасы булды», — диелә Россия Тикшерү комитетының рәсми сайтындагы хәбәрдә.
Владимир Маркин бүген иртән хастаханәдә вафат булган. «Известия» басмасы мәгълүматларына караганда, соңгы елларда Маркин каты авырган.
Владимир Маркин 1965 елда туган. МГУда укыган. 2007-2016 елларда Россия Тикшерү комитетының Массакүләм мәгълүмат чаралары белән хезмәттәшлек идарәсе җитәкчесе булып эшли.
