Россия кешеләре президент вазифасында хатын-кыз булуга каршы түгелме?
Якындагы 10-20 елда Россиядә президент вазифасында хатын-кыз булу ихтималына респондентларның 40 проценты ышана.
Социологлар Россия халкының президент вазифасына хатын-кыз билгеләнүгә карата фикерен сорашкан. Бу турыда РИА Новости хәбәр итте.
Сораштыруда катнашучыларның 40 проценты киләчәктәге 10-20 елда Россиядә президент вазифасында хатын-кыз булырга мөмкин дип саный. 2011 елның июлендә бу күрсәткеч 57 процент булган. Сораштырылучыларның 47 проценты исә бу булмастыр дип уйлый. 2011 елда бу күрсәткеч 33 процент булган.
Сайлауда хатын-кыз кандидат өчен респондентларның 62 проценты тавыш бирергә мөмкин. Сораштыруда катнашучыларның 30 проценты тискәре җавап биргән, 8 проценты җавап бирергә авырсынган.
Респондентларның 61 проценты хатын-кызлар сәясәттә активрак катнашырга тиеш дип саный. «Сәясәт — хатын-кыз эше түгел», дигән позицияне 29 процент хуплый.
Бөтенроссия телефон аша сораштыру 25-27 сентябрьдә булган, анда 1000 респондент катнашкан. Статистик хата 3,8 проценттан артмый, диелә бу хәбәрдә.