Россия Гадәттән тыш хәлләр министры фаҗигале һәлак булды
Зиничев белән бергә оператор да һәлак булган.
Россия Гадәттән тыш хәлләр министрлыгы башлыгы Евгений Зиничев хезмәт бурычын башкарганда фаҗигале һәлак булды. Бу турыда РИА Новости хәбәр итте.
«Гадәттән тыш хәлләр министрлыгы Евгений Зиничевның хезмәт бурычын башкарганда һәлак булуын хәбәр итә. Ул Арктика зонасында гадәттән тыш хәл вакытына багышланган ведомствоара өйрәнүләр вакытында кеше гомерен саклап калырга тырышканда үлде», дип аңлатканнар министрлыкта.
Зиничев Дудинка шәһәренә Красноярск башлыгы Александр Усс белән килә. Ул янгын сүндерү часте төзелешен тикшерә. RT телеканалы җитәкчесе Маргарита Симоньян язганча, министр оператор белән бергә текә яр читендә басып тора. Шул чакта оператор суга егылып төшә. Зиничев аны коткарырга маташа, ләкин чыгып торган ташка бәрелеп һәлак була. Оператор да һәлак була.