Америка эшмәкәре, миллиардер, 2021 ел нәтиҗәләре буенча дөньяның иң бай кешесе (300 млрд $, SpaceX, Tesla, The Boring Company компанияләре җитәкчесе) Илон Маск Россия белән Украина арасында тынычлык урнаштыру тәкъдиме белән чыкты. Ул бу хакта Твиттерына язган. Маск Берләшкән Милләтләр Оешмасы күзәтүендә кабат референдумнар уздыру яклы.
«Югары ихтималлык белән ахыр чиктә азагы шулай булыр да. Моңа кадәр күпме кеше үләчәк – менә шул гына сорау», – дип язган ул.
Бизнесмен «Украина – Россия тынычлыгы»н тәэмин итә торган дүрт пунктны саный:
- Донбасста һәм Россия контролендәге территорияләрдә Берләшкән Милләтләр Оешмасы күзәтүендә референдум уздыру һәм бу җирләрнең киләчәк язмышын шулай ачыклау;
- Кырымны Россиянеке дип тану;
- Ярымутрауны су белән тәэмин итүне гарантияләү;
- Украинага «нейтраль ил» статусы бирү.
Илон Маск бу тәкъдименә тавыш бирү дә уздырган. Әлегә 58 процент укучылары аны хуплаган.
«Әйдәгез, шулай эшлик: Донбасс һәм Кырымда яшәгән кешеләр хәл итсен – алар Россиянең өлеше буламы, Украинаныңмы», – дип язган Маск.
Бизнесмен фикеренчә, атом-төш коралын куллану ихтималы аз, әмма юк түгел. «Россия өлешчә мобилизация уздыра. Кырымга куркыныч янаса, алар мобилизация уздыра һәм тулы масштаблы сугыш башлый. Ике яктан да корбаннар күп булачак», – дигән ул.
Илон Маскның АКШның космик гаскәрләре белән контракт төзүе билгеле.