Россия белән Украина арасындагы сөйләшүләр: уртак юнәлешләр бар, икенче раунд көтелә

РИА Новости хәбәр итүенчә, Мәскәү һәм Киев вәкилләре Белоруссиядәге сөйләшүләр вакытында аерым темалар буенча чишелеш таба алганнар. Сөйләшүләрдән соң делегацияләр, консультацияләр алу өчен, кайтып киткән.

Россия делегациясен президентның ярдәмчесе Владимир Мединский җитәкли. Ул сөйләшүләрнең биш сәгать баруын әйткән. Ул кайбер пунктлар буенча уртак позицияләрне фаразлау мөмкин, дигән. «Иң мөһиме: сөйләшүләрне дәвам итәргә килештек», — дигән Мединский.

«Ике як берничә өстенлекле теманы билгеләде, алар буенча аерым килешүләр күренә. Бу чишелешләр ниндидер мөмкинлек тапсын өчен яклар консультацияләр өчен башкаларына юнәлә. Ике як якын арада сөйләшүләрнең икенче раундын уздыру мөмкинлеге турында сүз алып барды, аларда бу темалар конкрет үсеш табачак», — дигән Дәүләт Думасының халыкара эшләр буенча комитеты рәисе Леонид Слуцкий. Ул сөйләшүләрнең уңай нәтиҗәгә китерәчәгенә өметләнүен әйткән, башкача булса, эш дәвам итмәс иде, дигән.

Дипломатик телдән күчергәндә, әлегә сөйләшүче яклар бернәрсә турында да тәгаен генә килешмәгән, әмма уртак тел тапкан һәм сөйләшүләр өзелмәгән дигәнне аңлата.

Чираттагы очрашу Польша-Белоруссия чигендә булыр дип көтелә.

Украина делегациясе бурычы турында Владимир Зеленский «атышны туктату һәм Украинадан гаскәрләрне чыгару» дигән иде.

Россиянең БМОдагы вәкиле Василий Небензя, БМОның гадәттән тыш сессиясендә чыгыш ясап, Россиянең сугышны башламавын, Киевның үз халкына башлаган сугышын тәмамлавын гына әйтте.