Ризат Рамазанов: «Хатыным эчке киемнәремә хәтле сайлап ала»
Зинира ирен «кайнанам табып биргән өченче балам» дип атаган.
Парлы җырчы Рамазановлар «Болгар радиосы»ның туры эфирына килгәч, Ризат үзенең кием сайларга яратмавы турында сөйләгән.
«Мин үзем шундый кеше: бер күлмәк ошаса, мин аны айлар буе салмый киям. Зинира миңа: «Әйдә берәр нәрсә алыйк инде, кеше арасында йөрибез бит», — дип әйтә инде.
Мин иртә белән торган вакытта миңа инде носки, ыштан, күлмәк, футболка әзерләп куелган була. Ак костюм белән ак водолазка кияргә икәнен дә алдан әйтеп куя. Мин ул яктан бик бәхетле.
Мин бәләкәй вакытта кибеттә йөрергә бер дә яратмый идем. Миңа кием сайлап бирә торган хатын туры килсә икән дип хыялландым. Зәвык дигән нәрсә я була, я юк бит инде. Аллаһка шөкер, шундый хатын туры килде. Эчке киемнәргә кадәр алып, туры килмәсә кире илтеп биреп, мәш килеп йөри. Чәчем артык үсеп китсә дә: «Ризат, башың зурая башлаган, чәчеңне алдырырга кирәк», — дип әйтеп тора», — дип сөйләгән җырчы.
«Кыскасы, кайнанам табып биргән өченче балам инде», — дип көлгән Зинира да, ире Ризатка кушылып.