Кытайның Хайнань провинциясенең элекке закон чыгаручысы Лю Синтайны, 316 миллион юань (45 млн доллар) күләмендә ришвәт алган өчен, активларын конфискацияләгәннәр һәм үлем җәзасына хөкем иткәннәр. Бу хакта Кытайның Үзәк телевидениесенә сылтама белән «Аргументы и Факты» газетасы яза.
Суд инстанциясе хәбәр иткәнчә, элекке түрәнең бу гамәлләре дәүләт мәнфәгатьләренә һәм халыкның иминлегенә җитди зыян салган. Лю Синтай үз гаебен таныган һәм ришвәтчелекнең хокук саклау органнары тарафыннан тулысынча тикшерелеп бетмәгән күпчелек эпизодлары буенча аңлатма биргән.
Хөкем карары 2 елга кичектереп үтәләчәк, диелә хәбәрдә.