Ришат Төхвәтуллинга әтисе: "Өйләнмичә авылга кайтма дип чыгарып җибәргән"

"Тамашачылар җырчы үзе турында, үз язмышы турында җырлый дип уйлыйлар. “Аккошлар мәхәббәте”ндә “Чык минем юлларыма” дип җырлый торгач, күп кенә кызлар, сәхнәгә чыгып: “Мин синең юлыңа чыктым”, - диделәр.

Бу хәлгә игътибар итә башладым. “Мәхәббәтем, кайда соң син” дип җырлагач, кызлар яза башлады: “Мин монда”, - дип.

“Онытырга мине тырышма”, - дип җырлагач, “Һаман мине оныта алмыйсыңмыни”, - дип яза башладылар.

Уфага баргач, моны Зифа апа Нагаевага сөйләдем. Мин аңа “җырлар шулай тәэсир итә икән, миңа шуны исәптә тотып җыр язып бирегез әле”, - дидем. Бер-ике көннән ул Зифа апа: “Ришат, махсус шушы хәл өчен җыр яздым, ул “Тыйнак кыз” дип атала”, - ди. 

Бу җырны мин җырламадым. Аны җырлаган булсам, тыйнак кызлар күбәеп китәр иде. Бер генә проблема туа, һаман сайланырга туры килә бит әле. Әле өстәвенә авылдан килгәндә әти әйтә: “Улым, өйләнмәсәң, бүтән кайтып йөрмә инде”, - ди.

Киләсе җырның исемен әйтергә дә куркам. “Сиңа барам”, - дип атала. Матур кызлар күп”, - дип сөйләде Ришат Төхвәтуллин һәм Венер Фәттахов сүзләренә Мурат Гайсин иҗат иткән “Сиңа барам” җырын башкарды.