Ришат Төхвәтуллин: «Артык тәнкыйть иҗади омтылышны баса, үз-үзеңә ышаныч кими…»
Ришатка фанат дуслары, тәнкыйть сүзләренә игътибар итмичә, алга барырга кушканнар, киңәшләр калдырганнар.
Ришат Төхвәтуллин инстаграм челтәрендәге фотосы астына: «Артык тәнкыйть иҗади омтылышны баса, үз-үзеңә ышаныч кими… Гел мактап торсалар да рәхәт түгел… Һәр нәрсәнең чамасы булырга тиештер, күрәсең», — дип язып куйган.
Аңа җавап итеп, фанат дуслары, тәнкыйть сүзләренә игътибар итмичә, алга барырга кушканнар, киңәшләр калдырганнар. Ришатның концертларына «бомба» дип бәя биргәннәр.
«Артык мактау да кешене боза, ләкин кайчак аның файдасы чиксез күп. Мактау эшкә дәрт бирә, җиң сызганып эшләү өчен тагын да күбрәк җаваплылык таләп итә. Шулай булгач, дустым, әйдә мактасыннар, тәнкыйтьли бирсеннәр. Бу халәт сине борчымасын. Уңышлар гына алып килсен. Бөек шагыйребез әйтмешли: «Әйдә, халыкка хезмәткә!» — дип язганнар.
«Иии, бәбекәчем, сандугачыбыз, син бит танылган кеше, шуңа тәнкыйть тә күп булыр инде. Я Ходаем… Мактау да күп булыр. Аллаһы Тәгалә ярдәменнән ташламасын берүк… Сабырлык, түземлек телә, җаныкаем. Син күп эшлисең… Ә күп эшләгән кешене бездә яратмыйлар. Далеко ходить не надо. Путин да бик күп эшли. Ә аңа ни генә язмыйлар, тәнкытьлиләр. Түзә ич, рәхмәт яусын, Президентыбыз», — дигән икенче инстачы апа.
«Ришат, яшь кенә булсаң да, төпле фикерлисең. «Барс-медиа» җәнҗалына да дөрес бәя бирдең. Эшләргә, эшләргә һәм тагын да югарырак максатлар куярга!» - дип канатландырганнар артистны.
Мактау белән тәнкыйть арасында алтын урталыкны табарга кушучылар да табылган.