Ришат Фазлыйәхмәтов балалар турында хыяллана
Җырчы Гашыйклар көне уңаеннан Тәтишкасына мәхәббәт аңлаткан.
«Мин Сиңа гашыйк! Һәр күзәнәгем, һәр сулышым белән. Тормышымда Син барлыкка килгәннән бирле һәр көнне елмаясы, яшисе, яшьнисе килә! Сынауларда сынмаган өчен Раббым миңа Сине бүләк итте кебек. Гомер көзләремне синең белән үзебезнең нәни йортыбызда балалар һәм оныклар арасында каршы аласым килә.
Беләм, бәхет тынычлыкны ярата диярсез, ләкин мәхәббәт турында сөйләми мөмкин түгел. Күпме әсәрләр, җырлар язылган шушы хис турында… Арагызда миндәй тиле гашыйклар шактый бит инде.
Күгәрченнәр, Гашыйклар көне белән сезне! Гөр-гөр килеп яшәгез!
Ә кемнәр әле үз ярларын тапмаган, чын йөрәктән үз мәхәббәтегезне очратуыгызны телим! Менә бар күңелем белән телим, ә мин теләгән теләкләр һичшиксез чынга аша», — дип мәхәббәтен белдергән җырчы Ришат Фазлыйәхмәтов хәләл җефетенә.
«Мәхәббәтегезне саклагыз», дип теләгән инстачылар яшь гаиләгә.