Ришат Төхвәтуллинга «Танцы на ТНТ» җиңүчесе: «Хәзер татарча гына сөйләшәчәкмен»

Ришат Төхвәтуллинның Оренбургта узган концертына әнисе һәм башка туганнары белән «Танцы на ТНТ» проекты җиңүчесе, танылган хореограф, җырчы Илшат Шабаев килгән.

Илшат үзенең сторисларында Ришатның концерты турында: «Нинди тавыш! Бу тавыш теләсә-кайсы күңелне дәвалый ала. Искиткеч җырчы, биюе дә искиткеч. 3 сәгать бер тында узып китте. Концерттан соң гаиләбез белән сәхнә артына уздык. Хәзер инде сеңлем генә түгел, мин дә Ришатның фанаты», – дип яза.

Ришат Төхвәтуллин да, Илшат «Танцы на ТНТ» проектында катнашканда, аның өчен җанаткан булган икән. Илшат белән Ришат шул турыда да сөйләшкәннәр.

«Танышуыбызга бик шатмын! Мин бүгеннән – синең фанатың! Хәзер татарча гына сөйләшәчәкмен инде! Бик зур рәхмәт! Оренбург сезне ярата һәм тагын көтеп кала», – дигән танылган биюче Ришат Төхвәтуллинга.