Ришат Төхвәтуллинның әти-әнисе бу көннәрдә Казанда кунакта. Алар кызлары Айгөлне ире белән җылы якларга ял итәргә җибәреп, оныклары Сәйдәне карарга килгәннәр. Сторисларыннан күренгәнчә, әти-әнисе Ришат белән Алиядә дә еш кунак булалар. Шундый очрашуларның берсендә Ришат әтисенә бик кызыклы сорау биргән.
«Бала туганда хатын янәшәсендә торырга сорыйлар. Менә болай, кулдан тотып: «Молодец, әйдә, әйдә», – дип торырга. Менә элекке вакыт булса, син барыр идеңме хатын бала тапканда кырыенда торырга? Дөресен әйт», – дигән ул әтисенә.
«Юк инде, нишләп», – дип җавап кайтарган Ришатка, оялып беткән әтисе.
Ришатның әлеге видеосы күпсанлы комментарийлар да җыйган. Алар арасында «хатыны бәби тапканда ир-атның ерактарак торуы хәерле» дигән фикерләр дә, «баласы дөньяга килгәнне үз күзләре белән күрү ир-ат өчен бик файдалы, аларның бала белән элемтәсе яхшырак була» дигән фикерләр дә бар.
«Мин ирем янәшәмдә булуын теләмәс идем. Ир-атка бала тапканны карап тору нигә инде ул? Минем табибларым искиткеч әйбәт иде. Ирем матур итеп каршы алды. Һәркем үзе сайлый инде»;
«Әгәр хатының шулай тели, үзенә шулай рәхәтрәк булачак дип саный икән, барырга кирәк инде»;
«Минем ирем – табиб, төрле хәлләрне күргәне бар. Шуңа да ул минем янәшәмдә булды. Ул әле дә бу дулкынландыргыч мизгелләрне еш искә ала»;
«Ришат, Алия белән бергә барыгыз. Гомерлеккә исеңдә калачак ул синең. Алиягә җиңеллек телибез», – дип язып калдырганнар.