Социаль челтәрләрдә сыерга аю һөҗүм иткән видео ролигы таралды. Аны Саба районы дип тә, башка район дип тә язалар.
«Телеграм» каналлар хәбәр итүенчә, бу – Мәләвез районы Нугуш авылы янында булган хәл. Монысы дөрес булырга тиеш, чөнки кадр артындагы Ринат исемле ирнең башкортча сөйләшкәне ишетелә. «Телеграм» каналы язуынча, машинада барган кешеләр аюның сыерга ташланганын күрә. Ринат исемле ир куркып калмый, машинадан чыга. Башта кычкырып-сүгенеп аюны куа. Аннары машинадагы кешеләр сигналга басып кычкырта башлый, Ринат аюга күсәк ыргыта.
Сыерны инде җиңдем дип уйлаган аю куркып йөгерә. Җиргә егылган сыер торып китә. Аның сыртында зур яра күренә. Әмма ул йөри алырлык хәлдә.
