Римма Никитинага: «Бу алтын балык кем ятьмәсенә кабар икән?»
Җырчы инстаграмга купальниктан диңгез буенда төшкән фотоларын урнаштырган.
Бу көннәрдә Римма Никитинаның инстаграмын диңгез буенда купальниктан төшкән фотолары бизи. Җырчы Краснодар якларына ял итәргә киткән икән.
«Һәр яңа туган көнгә сөенеп яшәгез. Тормышны яратырга өйрәнегез! Кешеләргә яхшы кәеф һәм үзегезнең елмаюыгызны өләшегез. Яшәве күпкә матуррак һәм кызыклырак булачак. Сезне яратып, зажигалка Римма», — дип язган ул фотолары астына. Римма үзеннән көнләшүчеләрдән һәм хейтерлардан начар комментарийлар калдырмавын үтенгән. «Язып та тормагыз, миңа 32 яшь һәм мин чибәр», — дигән ул аларга.
Җырчының купальниктан төшкән фотолары ир-егетләргә аеруча ошаган. «Бигрәк матурсың», «Бу алтын балык кемнең ятьмәсенә кабар микән?», «Артың белән дә борыл инде», — дип язып, күп санлы йөрәк смайллары калдырганнар алар.
Берсе Римманың яше баруына ишарәләп: «Сиңа кияүгә чыгып, балалар үстерергә вакыт», — дип киңәш биргән. «Минем өчен борчылмагыз. Вакыты җиткәч, кияүгә дә чыгармын, менә дигән балалар да табармын», — дип җавап кайтарган аңа Римма.