«Салават Фәтхетдинов башкаруында Равил Фәйзуллин сүзләренә бер җыр бар. «Кабат сагынма икән» җырын күбебез беләдер, мөгаен. Галимебез Тәлгат Галиуллинның китабын эшләгән вакытта шул җырның сүзләренә юлыктым. Ләкин ул бу урында бөтенләй башкача. Тагын да яхшырак:
Чарам булса, горур йөрткән
башымны имәс идем.
...Бергә булсак, сине, бәлки,
бу кадәр сөймәс идем.
(«Бәлки...»)
Исеме дә, эчтәлеге дә мине гаҗәпкә калдырды. Туктале, минәйтәм, бу шигырьне тулысынча табыйм әле. Эзли торгач, 2005 елда чыккан 6 томлыгының 2нче томында 32нче биттә түбәндәге вариантка юлыктым. 1971 елның 19 сентябрендә Әлмәттә язылган юллар:
* * *
Бәхетле булып, таңгача
йөргән идек икәү без.
Каушырга да өлгермичә,
аерылган икәнбез.
Без яраткан ул ләйсәннәр
кабатланмас микәнни?
Бу йөрәкләр, өзгәләнеп,
кабат янмас микәнни?
Көзге соңгы чәчәкләргә
саксыз кагылма икән.
Үзең теләп бер хушлашкач,
кабат сагынма икән.
Игътибар белән карасам, беренче телгә алынган сәтырлары юк. Ә алары шул ук томлыкның 50нче битендә урын алган икенче шигырьдә икән:
* * *
Синең өчен җанатмасам,
саргаймас, көймәс идем.
Бүтәннәрдә булса күңлем,
«бәгырем!» димәс идем.
Чарам булса, горур йөрткән
башымны имәс идем.
...Бергә булсак, сине, бәлки,
бу кадәр сөймәс идем.
1972, 25-26 гыйнвар, Әлмәт
Шулай итеп, Бату Мөлеков көйгә салган «Кабат сагынма икән...» җыры Татарстанның халык шагыйре Равил Фәйзуллинның 2 исемсез шигырен бергә кушып язылган җыр булып чыкты», – дип яза Рифат Сәлах.