Рифат Фәттахов Иркәнең «Кыргый гөлем» җыры турында: «Бу җыр 10 ел элек иҗат ителгән иде»

Җырчы Иркә башкаруындагы «Кыргый гөлем» җырын тамашачы яратып кабул итте. Бу җырның тарихы да бар.

«Бер атна эчендә «Кыргый гөлем» җыры хит булды. Ул «Яңа татар җыры» конкурсы лауреаты булган иде. Матур җырчыларга матур җырлар бүләк итә бу җыр», – дип язган продюсер Рифат Фәттахов социаль челтәрдәге битендә.

Рифат Фәттахов җырчы Иркәнең концертында да булган. Анда ул бу җырның язмышы турында сөйләгән.

Видео: Рифат Фәттаховның социаль челтәрдәге битеннән.

«Бу җыр 10 ел элек туды. Әмма ләкин без аның башкаручысын таба алмадык. Узган ел Иркәгә дә тәкъдим иткән идек. Ул да алынмады. «Рифат абый, бик авыр җыр. Мин моны җырлый алмыйм», – диде. Ходайның «амин» дигән сәгате туры килгәндер. Бу җырны бу дәрәҗәдә башкарып чыгу өчен, синдәй көчле хатын-кыз энергетикасы кирәк. Бик зур рәхмәт», – диде продюсер.

«Бәлки, җырларга да өйрәнгәнмендер инде», – дип әйтеп, Иркә тамашачылар кәефен күтәрде.

Комментарийларда «Кыргый гөлем» җырын халыкның яратып кабул итүе күренә.