Рифат Фәттахов мактаулы бүләккә ия булган
Әлеге указны Татарстан Президенты Рөстәм Миңнеханов имзалаган.
Рифат Фәттаховны Татарстан Республикасы алдындагы казанышлары өчен ордены медале белән бүләкләү турында указга кул куелган. Әлеге указны Татарстан Президенты Рөстәм Миңнеханов имзалаган. Бу хакта Ваһапов фестиваленең инстаграмдагы сәхифәсендә хәбәр итәләр.
«Татар халкының мәдәниятен һәм гореф-гадәтләрен саклауга һәм үстерүгә зур өлеш кертүе, күпъеллык нәтиҗәле хезмәте өчен Татарстан Республикасының Рәшит Ваһапов исемендәге татар мәдәнияте иҗтимагый фонды директоры Фәттахов Рифат Әхмәт улы Татарстан Республикасы алдындагы казанышлар өчен ордены медале белән бүләкләнә», — диелгән указда.
«Рәхмәт ишетүе рәхәт», — дип язып куйган Рифат Фәттахов үзе дә инстаграм сәхифәсендә. «Минем хезмәтемне күргән, бәяли белгән Татарстан Республикасы Президенты Рөстәм Миңнехановка, мине бу дәрәҗәле бүләккә тәкъдим иткән Татарстан мәдәният министры Ирада Әюповага ихлас рәхмәтләремне юллыйм», — дип тә язган.