Аш-су остасы Резидә Хөсәеновадан әфлисунлы печенье рецептын тәкъдим итәбез. Ингредиентлар чама белән алына.
Ингредиентлар: әфлисун, атланмай, шикәр комы, шикәр оны, йомырка, көпшәкләндергеч, он.
Бер әфлисунның кабыгын угычтан уарга (сары өлешен генә, агы әче була) һәм ике аш кашыгы согын да сыгарга. Аннары шикәр комын салып яхшылап болгатырга, шул массага калган ингредиентларны салып болгатырга.
Камырны суыткычта бер сәгать ял иттерергә. Аннары шарчыклар ясарга. Аларны башта шикәр комында, аннары шикәр онында әвәләргә.
180 градуска кадәр кызган духовкада 15-20 минут пешерергә.
