Режиссер Илшат Рәхимбай: «Коронавирус дөрес суламаганга чыкты»
Продюсер, режиссер Илшат Рәхимбай Кабан күле янында дөрес сулыш алу күнекмәләре буенча тренинг үткәргәч, хәбәрчебез белән сәер генә итеп сөйләшеп алды.
Татарстанда игълан ителгән Туган телләр һәм халыклар бердәмлеге елында Казанда татар телендә «Хәрәкәттә — бәрәкәт» дип аталган ачык хореографик һәм спорт дәресләре башланды. Беренче дәрес дөрес сулыш алуга багышланган иде. Аны Кабан күле янындагы кроссфит мәйданчыгында продюсер, режиссер Илшат Рәхимбай һәм сценарист, режиссер Гөлнара Иванова татарча алып барды.
«Татар-информ» хәбәрчесенең: «Дөрес суламасаң, нәрсә булырга мөмкин?» — дигән соравына: «Дөрес суламаганга, татар эстрадасы барлыкка килә, депутатлар сәер ачышлар ясый. Коронавирус та дөрес суламаганга чыкты», — дип шаяртты Илшат Рәхимбай.
Аннан соң бераз җитдиләнә төшеп, болай диде: «Сулышны төрлечә алырга була. Актив, тынычландыра торган сулышлар бар. Без пранаяма, ягъни йогада сулыш күнегүләре, ясадык. Бу тормыш энергиясен контрольдә тотарга өйрәтә, сәламәтлекне ныгыта. Күнегүләрне көндәлек рәвештә эшләгән очракта, тормыш сыйфаты яхшыра», — диде ул.
Илшат Рәхимбай да, Гөлнара Иванова да — иҗат кешеләре. Алар дөрес сулыш алырга өйрәтә аламы? Бу сорауны алып баручыларның үзләренә дә бирдек.
«Иҗат кешеләре булсак та, күнегүләрне үткәрдек. Чөнки әлеге тәҗрибә белән без 2011 елдан бирле шөгыльләнәбез. Кешегә беренче тапкыр өйрәттек. Үзебез иң яхшы тренерларның берсендә өйрәндек», — диде алар.
Без сөйләшкәндә Кабан күлендә дәртле көй яңгырый иде. Сөйләшеп бетерүебез булды, Илшат Рәхимбай түзә алмыйча, утырган җиреннән биеп тә җибәрде. Видеосын беркеттек. Матур бииме?