Резеда Шәрәфиева һәм Равил Галиевлар – аерылмас дуэт. «Туган тел» телеканалындагы «Сер итеп кенә» тапшыруына артистлар үзләренең уртак иҗаты, дуэтларының үзенчәлекләре турында сөйләгәннәр.
Алып баручы:
Сез бит бергә генә концертлар куеп йөрмәдегез, үзегезнең шәхси концертларыгыз белән дә чыгышлар ясадыгыз, шулай бит?
Резеда Шәрәфиева:
Без аерым да йөрибез, Равил белән дә йөрибез, башкалары белән дә йөрибез.
Равил Галиев:
Башкалары белән күбрәк Резеда йөри. Минем башкалар белән йөргән юк әле, йөреп карыйсым килә.
Алып баручы:
Сезнең бит буйларыгыз да бик туры килеп бетми, тавышлар туры киләме? Ничек сез дуэт булып җырларга карар иттегез соң?
Резеда Шәрәфиева:
Беләсезме, тавышлар да, буй да, гомумән, бернәрсә дә туры килми. Әмма Равил белән эшләргә җиңел. Без инде «Сердәш» ансамблендә бергә эшләгәч, бер-беребезне аңлап, төркемебезне туплап, матур гына эшли башладык. Тамашачы башта безне кабул итә алмыйча интекте. Соңыннан ияләште дә. Үзем генә чыкканда: «Кая соң Равил? Равилне ташладыңмы әллә?» – дип, башка кеше белән җырлап йөргәнемне яратасылары килми. Дуэтыбыз яши, Аллаһка шөкер, бүгенге көндә дә очрашып, концертлар куеп торабыз.
Равил Галиев:
Әле бик матур яңа программа эшләдек. «Рәхмәт сиңа» дигән. Алла бирсә, сезнең якларга да килү мөмкинчелеге булыр.