Җырчы Ренат Ибраһимовның вафатына берничә сәгать кала соңгы репетициядән видеосы чыкты. Аны Татарстанның Мәскәүдәге Тулы вәкаләтле вәкиллеге телеграм каналына урнаштырганнар.
«Ренат Исламович музыкантлар белән 19 май көнне узачак концертка әзерләнде. Татар телендә «Юллар» дигән җыр башкарачак иде. Муса Җәлил сүзләренә Радмир Шәйхетдинов көй язды. Җырда түбәндәге юллар бар:
«Юллар, юллар! Мине туган йорттан
Аерып ерак алып киттегез.
Җитәр инде, озак кунак булдым,
Хәзер кире өйгә илтегез…»
«Нинди моңсу җыр», – дигән Ренат Ибраһимов видеоны төшереп торучы, концертның продюсеры Ольгага» – дип язалар анда.
Телеграм канал Ренат Ибраһимов белән хушлашуның бүген, 15 май көнне Мәскәүнең Җәмигъ мәчетендә (Выползов урамы, 7 йорт, "Тынычлык проспекты" метро станциясе)15.00 сәгатьтә башланачагын хәбәр итә. Җеназа намазы 17.00 сәгатьтә укылачак. Җырчыны Волков зиратының (Мәскәү өлкәсе, Мытищи шәһәре) мөселманнар өчен бүленгән өлешендә җирләячәкләр.