Шагыйрь, алып баручы Ренат Галиәскәр Илсөя Бәдретдинова янына килгән. Ике дус кая җыенгандыр, әмма Ренат бик стильле киенгән, сары галстук таккан, кулында – кызыл розалар бәйләме. Илсөя дә матур кичке образдан. Фото янына Ренат: «Кунакка кереп чыктым әле», – дип язып куйган.
Әйтергә кирәк, язылучылары арасында Ренат белән Илсөя Бәдретдинованы дуслар түгел, пар буларак күрергә телүчеләр дә бик күп. Бу турыда әлеге ике популяр шәхескә әледән-әле язып та торалар. Бу юлы да алар: «Кунакка гына йөрешмәгез, өйләнешегез дә куегыз инде. Бигрәк матур парлар булыр идегез», «Сез – искиткеч пар. Барыбыз да сезнең ЗАГСка баруыгызны көтәбез» ише комментарийлар калдырганнар.
«Кунак кына? Ренат, сай йөзәсең», – дип егетне битәрләүче дә табылган.
Соңрак Ренат Галиәскәрнең Илсөя Бәдретдинова белән тапшыру төшерүе билгеле булды.
