Сентябрь башында матрасны дөрес карау уңайлы йокыны тәэмин итә һәм аның хезмәт итү вакытын озайта. Бу хакта «RT» Роскачество матбугат хезмәтенә сылтама белән яза.
Матрасның ортопедик үзлекләрен саклап калу өчен, аны кимендә ярты елга бер тапкыр әйләндереп торырга кирәк.
Ике яклы, ягъни «кыш-җәй» тибындагы матрасны сентябрьдә йомшаграк, ягъни «кышкы» ягына әйләндерергә киңәш ителә. Бу йоклаганда җылырак булырга ярдәм итәчәк. Ә гыйнварда матрасның «баш-аяк» юнәлешен алыштырырга кирәк. Бу аның деформацияләнүен булдырмаска ярдәм итә. Бер яклы матрасларны исә «баш» һәм «аяк» яклары белән чиратлаштырып тору җитә.
Яңа матрас сайлаганда, белгечләр аның күләменә игътибар итәргә киңәш итә. Йокы урынының озынлыгы кеше буена караганда кимендә 20 сантиметрга озынрак булырга тиеш. Кискен химик ис сизелсә, арзан матрасларда токсиннар бүлеп чыгаручы синтетик материаллар булырга мөмкин. Аллергиясе булган кешеләргә дә игътибарлы булырга кирәк: мәсәлән, йон кебек табигый материаллар аллергия реакциясе китереп чыгарырга мөмкин.
Өлкән яшьтәге кешеләргә артык каты өслектә йокларга киңәш ителми, чөнки бу умыртка баганасында авырту барлыкка китерергә мөмкин.
Пружинасыз матраслар кеше гәүдәсе формасын ала. Пружиналы матраслар исә бәйле («боннель») һәм бәйсез пружиналы төрләргә бүленә. Бәйсез пружина блогы булган матраслар умыртка баганасына нокталырак терәк бирә һәм «дулкын эффекты»н булдырмый. Ягъни бер кеше хәрәкәтләнгәндә, аның хәрәкәте икенче кешегә комачауламый, диелә хәбәрдә.