Тимергали хәзрәт Юлдашев телеграм-каналында Расүлебез еш кабатлаган сүзләрне искәртте.
Расүлебез салләллаһу галәйһи вә сәлләм: «Аллаһ белән ант итәм, мин көненә 70 мәртәбә Аллаһтан истигъфар сорап, Аның гафу итүен үтенеп мөрәҗәгать итәм», – дигән. (имам Әл-Бохари)
Икенче хәдистә Пәйгамбәребез салләллаһу галәйһи вә сәлләм: «Әгәр берәү даими рәвештә Аллаһтан гафу итүен сораса, Раббыбыз аңа теләсә кайсы бәладән чыгу юлын күрсәтер, борчуын җиңеләйтер һәм көтмәгән җирдән ризыкландырыр», – дип әйткән. (имам Әбү Давыд)
Истигъфар сүзләре:
Укылышы: «Әстәгъфируллааһүл-газ̣ыыйм».
Мәгънәсе: «Бөек Аллаһтан гөнаһларымның гафу ителүен сорыйм».
Җомга көне мөбарәк булсын! Ил-көннәребез имин, күкләребез якты, күңелләребез тыныч, ниятләребез дөрес булса иде, дип яза хәзрәт.
