Ранис Габбазовның 30 яшьлегенә Азат Абитов үзенең 2011 елгы кардиганын бүләк иткән

Шушы көннәрдә Рәшит Ваһапов исемендәге фестивальнең яшь башкаручылар конкурсы җиңүчесе Ранис Габбазов 30 яшен тутырган. Күркәм юбилеен ул «Туган авылым» ресторанында үткәргән.

Юбилейда гаиләсе, якыннарыннан тыш, иҗатташ дуслары да булган. Шуларның берсе – Азат Абитов һәм Гөлсирин Абдуллиналар.

Абитовлар гаиләсе сәхнәдәшләрен, күптәнге якын дусларын туган көне белән котлап, Раниска Азатның бик күп еллар элек сатып алынган кардиган-кофтасын бүләк иткәннәр. Бу турыда Азат болай дип сөйләгән:

– 2011 елда Ранис миңа кунакка килгән иде. Җәйнең бик эссе көне иде, чөнки, хәтерлим, Ранис бик юка киенгән иде, футболкадан гына. Инде 2-3 көн кунак булгач... Бәлки, берәр айдыр... Ранис китәргә җыенды. Ул кткәндә бик салкын, яңгыр да ява иде. Раниска кайтып китергә кирәк, ә ул – футболкадан. Аны бит инде алай җибәреп булмый, өстәвенә, ул – Рәшит Ваһапов фестиваленең гран-при иясе (ул вакытта булачак). Шуңа күрә мин аңа үземнең өр-яңа кардиганымны тапшырдым. Кайтарырсың, мәйтәм. Шул көннән бирле кардиганны күргән юк!.. Инде бу хәлдән соң, без ул кардиган турында бик күп тапкыр сөйләштек. Ранис инде: «Кайтарам мин сиңа аны, борчылма», – диде. Мин инде борчылмый идем, ә Ранис борчыла башлады. Шуңа күрә, әйтәсе килә, Ранис, бүгеннән соң борчылма: кардиган – синеке!» – дип көлдергән ул.

Видео: Азат Абитовның социаль челтәрдәге аккаунтыннан