Ранил Нуриев татар эстрадасы сәхнәсеннән югалуының сәбәбен әйтте
Ранил 5 ел дәвамында социаль челтәрләр алып бармады, шулай ук журналистлар белән дә әңгәмә кормады.
![Ранил Нуриев татар эстрадасы сәхнәсеннән югалуының сәбәбен әйтте](https://intertat.tatar/resize/shd/images/uploads/news/2023/1/7/1a15405f50e1aeb0fc81a5b21a667c73.jpeg)
Ранил Нуриев исемле җырчыны хәтерлисезме? «Син минем янымда, Бар дөнья көлә хәзер», – дип җырлый иде ул. Ниһаять, Ранил сәхнәдән югалуының, 5 ел дәвамында җырламавының сәбәбен әйтте.
«2017 елда Испаниягә күчәргә планлаштырган идем. Соңгы адымны ясарга вакыт җиткәч, тукталып калдым, кире уйладым. Якын кешеләремне калдырып китә алмадым. Аннан соң, башка илгә күчсәм, җырлаудан тәгаен туктарга кирәк булыр иде. Ә мин алай булдыра алмыйм, чөнки җыр – ул язмышымның бер өлеше», – ди Ранил.
Аның сүзләренчә, иҗатта пауза ясавы татар сәхнәсендә булган дәрәҗәнең ошап бетмәве белән бәйле. «Димәк, үсәргә, өйрәнергә кирәк, дидем. Безнең татар җырын бар дөньяда тыңласыннар иде – менә максатым. Бу теләгем хәзер тагы да артты. Тиздән барысын да бәйнә-бәйнә сөйләрмен. Шушы 5 ел эчендә дөньяга карата карашым, тормыш кыйммәтләрем бераз алмашынды», – ди җырчы.
Аңлавымча, Ранил үзен генә түгел, башка җырчыларны да популярлаштыру белән шөгыльләнә башлаган. «Бердәм һәм зур команда формалашты. Бары тик мин үземне продюсер дип атамыйм», – ди ул.
Шулай ук Ранил үзе дә алга таба тамашачысын яңа җырлар белән сөендерәчәк, ул җырлаудан туктамавын әйтте. Һәм, шуны да әйтеп үтик: Ранил әле дә өйләнмәгән! Аның төп яшәү урыны юк. Ул Мәскәүдә дә, Казанда да булгалый.
- Ранил Нуриев югалган – 2018 ел