«Рамис чын комбат иде»: Чаллы мэры Украинада һәлак булган солдатның әнисе белән күреште

Бүген Чаллы мэры Наил Мәһдиев Украинадагы махсус операциядә һәлак булган Рамис Заһретдиновның әнисе белән күреште, дип яза «Казанские ведомости».

Һәлак булган офицерның әнисе Дилә ханым «Чаллы икмәге» кибетендә эшләгән. Шул сәбәпле, кайгы уртаклашырга компаниянең генераль директоры Рафаэль Сөләйманов та килгән.

«Челнинские известия» язуынча, кайгы уртаклашырга килүчеләр дә, офицерның туганнары да озак дәшми торганнар. Шәһәр башлыгы: «Рамис Ватанны саклаучы чын комбат иде», дип белдергән.

Заһретдинов Казан танк училищесын тәмамлаган, Алтай краеның Алейск шәһәрендә хезмәт иткән. Аңа 34 яшь булган. Офицерны иртәгә җирләячәкләр, барлык чыгымнарны Чаллы мэриясе үз өстенә алган. Рамис Заһретдиновның Алейскида хатыны һәм ике баласы булган.