Рамил Хәйретдинов өйләндереп куюлары турында: «Рамилә әнисе белән туй көнен билгеләгән»

Рамилә һәм Рамил Хәйретдиновларның гаилә корып яши башлаганнарына 14 ел тулган. Татар эстрадасында хатыны иренә кияүгә чыгарга тәкъдим ясаган бер генә пар: Гөлназ – Илсур Шәрипҗановларны белә идек, баксаң, Хәйретдиновларда да өйләнү тарихы аларныкына охшашрак булган икән.

«Камыт кигәнемә 14 ел – агат туй.

2010 елның май аенда Камал театры тирәсендә йөргәндә, Рамилә миннән: «Кайчан өйләнергә җыенасың?» – дип сорады. «2-3 елдан, укуны тәмамлагач. Бәлки, алай ук сузмам да», – дип җавап кайтарган идем. Ә Рамилә апалары һәм әнисе белән шул ук кичне туй көнен билгеләгән. Миңа оештырасы гына калды. «Бәлки, сузмамын» дигәнне Рамилә тәкъдим ясау дип кабул иткән булган икән. Күргәнегезчә, Рамилә елдан-ел яшәрә, матурая, ә мин картаям», – дип сөйли Рамил бу хакта.

«Димәк, өйләнергә насыйп вакытыгыз шул вакытта булган. 5 ел элек безнең балаларның никахын алып барган идегез. Шуннан бирле бер дә үзгәрмәгәнсез», – дип мактыйлар һәм хәерле, озын гомерләр телиләр Хәйретдиновларга.