Юморист һәм җырчы Рамил Шәрапов социаль челтәрдәге аккаунтында бәләкәй чагында булган күңелле бер хәлне искә алган.
«Әти-әни 2 атнага Чиләбегә киткән иде. Ул вакытта инкубаторлар модада иде, ягъни йомыркаларны ут астында тотып, чеби чыгару. Күп кешенең инкубатор бар иде инде. Ә мин ул әйбер турында кемнәндер ишетеп алдым да, гади лампа астына 2 күкәй куйдым. Имеш, әти-әни Чиләбедән кайтканчы, лампа астында чеби чыгарам. Чыкмый да чыкмый инде. Ничек мин өйдә янгын чыгармаганмын, Аллаһы Тәгалә саклап калган. Аннан, тизрәк чыксыннар дип, 2 лампа куйдым – чыкмый.
Бер атнадан соң, чебиләрем чыга дигәндә, әнинең әнисе мине тапты. Ул күкәйләрне бер якка, икенче якка атып бәрде. Минем бизнес ватылды. Менә эләккән иде анда миңа! Бик кызык хәл булды ул. Әти-әниегез Чиләбегә китсә, чеби чыгарыгыз», – дип сөйли ул көзге алдында грим салганда.
