Шәрәпҗан образында танылу алган юмор остасы Рамил Шәрәпов социаль челтәрдәге сәхифәсендә быел үзе катнашкан Сабантуйларга нәтиҗә ясаган.
«Быелгы Сабантуйларга нәтиҗә ясап алыйк әле:
1. Барлыгы биш Сабантуйда катнаштым.
2. Быелгы Сабантуйларда үзем генә түгел, Шәрәпҗан да бар иде. Мин алып бардым, Шәрәпҗан халыкны уйнатты. Мәш килдек, кыскасы.
3.Башка елларны тачка белән ярышларда кызык ясап йөрсәм, быел исә рәхәтләнеп чаңгыда «шудым». Теге кызык видеодан соң, мине тагы да күбрәк чакыра башладылар. «Безгә дә килеп, кызык ясап китегез әле», – диләр. Очраган саен: «Ну теге апаның «телевизор»ын ваттың», – дип көләләр.
4. Әлеге кызык видеоны «Однаклассники»га урнаштыргач, дүрт йөз мең кеше караган! Гомердә андый рекорд булганы юк иде.
5. Шул видеодан соң авыл көннәренә чакыра башладылар. Кайберләренә Рамил Шәрәпов кына кирәк, кайберләренә – Шәрәпҗан гына. Хәзер без алмаш-тилмәш халык күңелен күрәбез.
6. Быел Питрау Сабантуенда да катнашачакмын.
7. Фотодагы апага килгәндә, Тулбай авылында булган хәл бу. Ул апа мин Сабантуйга килмәсәм, катык ярышында катнашмый. Мин клсәм инде, катыктан чыкмый да», – дигән Рамил.
«Шәрәпҗан булган җирдә ничек күңелле булмасын! Һәрвакыт без яраткан Шәрәпҗан булып кал. Ходай биргән талантың чәчәк атсын», «Башкортстанга да кил әле», «Сабантуйлардан үзегез катнашкан видеоларны күбрәк куегыз әле», – дип язганнар Рамилгә виртуаль дуслары.
Ике апа арасында, уртада Рамил чаңгы киеп ярышкан теге видеоны карагыз әле. Чынлап та, әкәмәт килеп чыккан.