Рамил Шәрәпов балалары турында: «Замана таләпләренә буйсынмыйча, каршы килеп тәрбиялибез»

«Туган тел» телеканалындагы «Сер итеп» тапшыруында юмор остасы Рамил Шәрәпов балалар тәрбияләү серләре белән уртаклашкан. Ул тормыш иптәше белән Раян һәм Ленара исемле ике бала үстерә. Хәзер Раянга – 11, ә Ленарага – 8 яшь.

«Замана таләпләренә буйсынмыйча, каршы килеп тәрбиялибез. Чөнки телефон һәм башка моментлар бар. Мин үзем, нечкә күңелле булсам да, өйдә усалрак, кырысрак әти. Чөнки без – башка тәрбия күргән кешеләр. Хәзер балаларны ул тәрбия белән куркыта алмыйсың, шунда ук «статья» диячәкләр.

Минем иң борчылган әйберем – кешелеклелек сыйфатларын җуймаган балалар тәрбияләү. Кеше рәнҗетмичә, үзләренең дә юлларында яхшы кешеләр генә очрап, аларның бәхетенә шатланып, куанып яшәргә насыйп әйләсен. Чөнки әти-әниләр дә әйбәт була, ә балалар – төрле. Без бит юнәлеш бирүчеләр генә.

Игътибарны артык бирсәң дә, дилбегәдән ычкынырга мөмкиннәр. Һәрберебезгә итагатьле, тыйнак, кешелекле балалар насыйп әйләсен», – дигән Рамил Шәрәпов.