Рамилә Хәйретдинова: «Кирәкмәгән икейөзле кешеләрне тормышыбыздан сызып ташлыйбыз»
Җырчы Рамилә Хәйретдинова күңелендәге үзгәрешләре хакында сөйләде.
«Өйдә утырабыз! Уйланабыз!
Нәтиҗәләр ясыйбыз, кирәкмәгән икейөзле кешеләрне тормышыбыздан мәңгегә төшереп калдырабыз, кирәклеләре, безне чын йөрәктән яратып, хөрмәт иткәннәре, әлбәттә, безнең белән!
Әмма сүзем ул турыда түгел.
Менә бу фотога өч ел тирәләре. Ачык күлмәк, ачык декольте. Хәзер инде мин башка. Әкренләп үземне, күнелемне, уйларымны, җанымны үзгәртәм. Ачык күлмәкләр кимәдем түгел. Бары тик вакыт барган саен уйлар, дөньяга карашым үзгәрә. Тулысынча ябык күлмәкләр кимим, сүз яулык турында да бармый. Бары тик кыска итәк, өске өлеш күренеп тора торган күлмәкләрдән баш тартырга өйрәнәм. Иремә дә, кешеләргә дә ошар өчен түгел. Бары тик күңел шулай тели.
Тик гардеробта да, сәхнә киемнәремдә дә ачык киемнәр бар әле», — дип язган җырчы.
«Матур хатын-кыз! Тышкы кыяфәтең дә, эчке дөньяң да матур. Үзгәрмә», — дип комментарий калдырган җырчы Ландыш Нигъмәтҗанова.
«Тагын нинди матур фотоларың бар, күрсәт әле!» — дип язган җырчы, композитор Гүзәлия.
«Ачык, матур күлмәкләрне өйдә, иреңә генә киеп йөрергә кирәк шул», «Рамилә! Син бик яшь әле, ки барысын да. Бик ошатабыз инде сезне», «Матур кешегә нәрсә кисә дә килешә», — дип язганнар җырчының виртуаль дуслары.
