Рафис Кәлимуллин каз күпертү буенча лайфхак белән бүлешә - видео
Инстачыларның күбесе казны күперткәнгә аптырап калган.
Җырчы, композитор Рафис Кәлимуллин авылда каз өмәсеннән видео куйган. Анда абыйсы каз канатын санагач кына йолкый башлый. Аннары махсус җайланма белән каз түшкәсен күпертәләр.
«Мондый егетләр булганда эш бара. Элек казны авыз белән өреп күпертә идек. Хәзер бөтен уңайлыклар да бар», — ди җырчының «икенче әнисе».
Инстачылар бу лайфхакларга аптырап калган.
«Ник канатны саныйсыз?» - дип сораучыга «12 канаттан соң гына йолкырга кирәк», — ди җавап биргән Рафис.
Инстачыларның күбесе казны күперткәнгә шаккаткан. «Ни өчен һава өрдерәсез? Без бөтенләй башкача эшлибез», «Нәрсәгә кабарталар икәнен әйтегез әле», — дип кызыксынган җырчының виртуаль дуслары.
«Яхшы йолкынсын өчен», «Каз матур, симез булып күренсен өчен», — дип җавап биргән бу эш белән таныш кешеләр.