Рәфис Атаказның ачуы килгән: «Җырласын инде Казаннан да бер татар «Новая волна»да»
Популяр татар блогеры Рәфис Атаказ «Новая волна» музыкаль фестивалендә татарларны җырлатмаулары турында тәнкыйди фикерен белдерә.
«Сәлам, бу тагын мин әле. Казанда шушы көннәрдә халыкара «Яңа дулкын» фестивале узды. Бик купшы узды, дип карап утырдым. Анда инде кемнәр генә юк, кемнәр генә килмәгән. Бөтен Россиянең шоу-бизнесы, яшь талантлар.
Казан 4 көн «Яңа дулкын»ны каршы алып, йоклатып, ашатып-эчертеп, күпме халыкны каршы алып, мәхшәр булды. Әмма шулар арасына бер генә татар җырчысын кертсәләр дә, бик кызык булыр иде. Казанга хәтле килгәч, күңелләре булсын бу татарларның, дип, бер генә татарча җырлый белә торган кешене куйсалар ни була иде. Шуңа ачуым килде әле! Керт инде, җырласын инде Казаннан да бер кеше, бер татар «Новая волна»да. Күңелең булыр иде… Юк инде, юк. Булмый инде булмагач, атаң колхоз председателе булмагач», – дип кәнәгатьсезлек белдерә блогер.