Рөстәм Миңнеханов инстаграм сәхифәсенә кызык мем урнаштырган
Анда Габдулла Тукай әкиятенең танылган геройлары - Шүрәле белән Былтыр сурәтләнгән.
Татарстан Президенты Рөстәм Миңнеханов инстаграм сәхифәсенә кызык мем урнаштырган. Анда Шүрәле белән Былтыр 31 декабрь һәм 10 гыйнвар көннәрендә сурәтләнгән. Яңа ел яллары ахырына Шүрәле белән Былтыр ике тапкыр тазарган. «Тиздән яллар тәмамлана. Сез эшкә чыгарга һәм мәктәпләргә барырга әзерме?» — дип сорый Президент инстачылардан.
«Әзер! Быел болай да күп ял иттек!», «Ял иткәч, дөньям түгәрәкләнде дип йөри идем. Шүрәлене күргәч кенә үзем түгәрәкләнгәнне аңладым», «Әле дә эш бар! Сагынып, рәхәтләнеп чыгам», «Ял итә-итә акча бетте, эшләргә кирәк», «Эшкә җәяү йөрисе булыр, мөгаен», — дигән җаваплар калдырган инстачылар.
«Пенсиядә булсам да, эшләрга язсын! Пенсия акчасына яшап булмый. Бик зур рәхмәт халык белән шулай аралашканыгыз өчен», — дип тә язганнар.
Бер инстачы шигырь юллары иҗат иткән.
«Хөкүмәтебезгә рәхмәт,
Кышкы ялларда бик рәхәт.
Тимераяк, чаңгы, чана,
Зурлар да тауга чаба.
Кайткач, кызу, парлы мунча,
Токмачлы аш, кайнар көлчә.
Бала-чагаң синең янда,
Искитмәле кышкы ялда.
Көчле, таза без хәзер,
Эшкә чыгарга әзер!